ພຣະຣາຊອານາຈັກຣ໌ລາວ

ນິ້ຄືຫລັກຖານໂຄງການເມືອງ 18 ຂໍ້ ສັນຍາຍຸດຕິສົງຄາມລະວ່າງ ຣັຖບາລ ຣາຊອານາຈັກລາວ ແລະ ຝ່າຍແນວລາວຮັກຊາຕ ຂອງ ສເດັດເຈົ້າສຸພານຸວົງທ໌ ເພື່ອຕ້ານທານການລ້າຫົວເມືອງຂຶ້ນຂອງແກວແດງ ແລະ ເພື່ອໃຫ້ລາວລວມລາວ ເພື່ອສັນຕິພາພ ເອກຣາຊ ເປັນກາງ ປະຊາທິປະໄຕຍ໌ ເອກພາພ ວັທນາຖາວອນ ໃນປີ ຄ.ສ 1973. ພັກແນວລາວຮັກຊາຕ ຊຶ່ງເປັນຜ່າຍຕໍ່ລອງ ຍຸດຍິງເປັນຜ່າຍກະບົດຕໍ່ສັນຍາ ແລະເປັນການວາງແຜນແຊກຊ້ອນກັບ ໂ້ຫຈີມິນ ໂຄດລົ້ມຣັຖບາລຜ່າຍວຽງຈັນທ໌ ແລະເຂົ້າການຍຶດອຳນາດທາງການທະຫານ ລ່ວມກັບທະຫານ ແກວແດງ ນັບຫຼາຍແສນຄົນ ໃນ ປີ ຄ.ສ 1975 ແລະປະກາດຂຶ້ນເປັນ ສປປ ລາວ ຮ່ວມກັບກອງກຳລັງທະຫານຂອງແກວແດງ ໃນວັນທີ 2 ທັນວາ ປີ ຄ.ສ 1975 ຢ່າງຜິດກົດໝາຍ ສາກົນ ແລະ ພາຍໃນປະເທດອີງຕາມຂໍ້ຕົກລົງໃນສັນຍາວຽງຈັນທ໌ ໂຄງການເມືອງ 18 ຂໍ້. ຫລັງຈາກຍຶດອຳນາດ ທັນທີທັນໄດ ພັກແນວລາວຮັກຊາຕ ກໍເລັ່ງຈັບກຸມ ທະຫານ, ນັກຮຽນ, ນັກສຶກສາ ຊາວໜຸ່ມ ຍິງ ຊາຍ ແລະ ຊາວບ້ານນັບຫລາຍແສນຄົນໄປຄຸມຂັງຕາມເຂດສາຍແດນແກວ ດ້ວຍວິທີການທໍລະມານຮ່າງກາຍ ທົບຕີ ແລະໄຊ້ແຮງງານເກີນກ່ວາມະນຸດ ເປັນວິທີການປະຫານຊີວິດແບບໂຫດຮ້າຍ ຊຶ່ງຜິດຕໍ່ກົດໝາຍສາກົນ. ຫລາຍມື່ນນາຍເສັຽຊີວິດດ້ວຍການທໍລະມານ ໃນນັ້ນມີ ພຣະບາດສົມເດັດພຣະເຈົ້າມະຫາຊີວິດ ພຣະມະເຫສີ ແລະ ພຣະຣາຊກຸມມານ ລວມດ້ວຍ. ດັ່ງນັ້ນພວກເຮົາຊຶ່ງເປັນສາຍເລືອດລາວຈຶ່ງສືບທອດໃນການຮຽກຮ້ອງໄປຫາອົງການສາກົນ ໃຫ້ມີການຮື້ພື້ນສັນຍາທຸກ ໆ ສບັບທີ່ມີປະໂຍດໃນການຂັບໄລ່ພວກລ່າຫົວເມືອງຂຶ້ນແກວແດງອອກຈາກການປົກຄອງລາວໂດຍດ່ວນ. ພວກເຮົາຄົນລາວທຸກຄົນຄວນໃຫ້ການຮວ່ມມືກັນ ແລະ ລົງລາຍເຊັນ ພິທິເຊິນ ໃຫ້ຫລາຍຂຶ້ນ ແລະຊ່ວຍບໍລິຈາກເສຖກິຈການເງິນເພີ້ມດ້ວຍ ເພື່ອໃຊ້ຈ່າຍໃນທາງດ້ານກົດໝາຍ. ຄອບໃຈທຸກ ໆ ທ່ານທີ່ໃຫ້ການຮວ່ມມື.

ໂດຍອ້າງອີງເຂົ້າຫາຈິຕໃຈຂອງສັນຍາວຽງຈັນທນ໌ ລົງວັນທີ 21 ກຸມພາ 1973 ກ່ຽວກັບກາຣຟື້ນຟູສັນຕິພາພ ແລະ ກາຣປະຕິບັຕຄວາມຖືກຕ້ອງປອງດອງຊາຕໃນລາວ ແລະ ໂດຍອີງເຂົ້າຫາຈິຕໃຈຂອງສັນຍາ ເຈນີວາ ປີ 1962 ກ່ຽວກັບລາວ.

ໂດຍອີງເຂົ້າຫາສະພາພຄວາມເປັນຈິງຂອງສັງຄົມລາວປັຈຈຸບັນ ຕາມລາຍງານກາຣເມືອງຂອງສເດັຈປະທານ ເຈົ້າສຸພານຸວົງສ໌ ທີ່ໄດ້ສເນີຕໍ່ກອງປະຊຸມຄົບຄນະ ຂອງຄນະມົນຕຣີປະສົມກາຣເມືອງແຫ່ງຊາຕ ສມັຍສາມັນທີ 1, ວາຣະທີ 3.

ເພື່ອສ້າງພຣະຣາຊອານາຈັກຣ໌ລາວໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະ ວັທນາຖາວອນ ຊຶ່ງສອດຄ່ອງກັບສິທປະໂຍຊນ໌ສູງສຸດຂອງປະເທດຊາຕ ແລະ ຕອບສນອງຄວາມມຸ່ງມາດປາຖນາອັນແຮງກ້າຂອງປະຊາຊົນບັນດາຊົນຊາຕຊົນເຜົ່າ ແລະ ພຣະຣາຊປະສົງຄ໌ອັນສູງສົ່ງຂອງພຣະບາທສົມເດັຈພຣະເຈົ້າມະຫາຊີວິຕ.

ຄນະມົນຕຣີປະສົມກາຣເມືອງແຫ່ງຊາຕ ໃນກອງປະຊຸມສມັຍສາມັນທີ 1, ວາຣະທີ 3 ເມື່ອວັນທີ 10 ພຶສພາ 1974 ແລະວາຣທີ 4 ເມື່ອວັນທີ 24 ພຶສພາ 1974 ໄດ້ພິຈາຣະນາ ແລະ ຜ່ານເປັນເອກສັນ ຮັບຮອງເອົງໂຄງກາຣສ້າງສັນຕິພາພ ເອກຣາຊ ຄວາມເປັນກາງ ປະາທິປະໄຕຍ໌ ເອກພາພ ແລະ ຄວາມວັທນາຖາວອນ ຂອງພຣະຣາຊອານາຈັກຣ໌ລາວດັ່ງລຸ່ມນີ້ ເພື່ອຈະໃຫ້ຣັຖບາລປະສົມຊົ່ວຄາວ ຖືເອົາເປັນແນວທາງດຳເນີນງານຮ່ວມໃຫ້ແກ່ບັນດາອົງຄ໌ກາຣປົກຄອງຂອງຣັຖ ແລະເອົາເປັນທິສທາງແຫ່ງຄວາມບາກບັ່ນພະຍາຍາມຂອງປະຊາຊົນພົລເມືອງ ຂອງກອງທະຫາຣ ແລະ ກອງກຳລັງປ້ອງກັນຄວາມສງົບ ໃນທົ່ວປະເທສ.

ໜ້າທີ່ຮ່ວມໃນສະພາພການຂອງໂລກໃນປັຈຈຸບັນນີ້ ອິດທິກຳລັງຮຸກຮານ ແລະກະຫາຍສົງຄາມພວມຖືກຂບວນກາຣຕໍ່ສູ້ຂອງປະຊາຊົນໃນທົ່ວໂລກ ເພື່ອສັນຕິພາພ ເອກຣາຊແຫ່ງຊາຕ ປະຊາທິປະໄຕຍ໌ ແລະຄວາມກ້າວໜ້າທາງສັງຄົມໂຈມຕີໃຫ້ນັບມື້ລ່າຖອຍໄປ, ການຕໍ່ສູ້ອັນຍືດເຍື້ອຍາວນານ ແລະພິຣະອາດຫາຣຂອງປະຊາຊົນລາວເຮົາ ຕ້ານອິດທິກຳລັງລ່າເມືອງຂຶ້ນຮຸກຮານ ກໍໄດ້ຍາດເອົາໄຊຊະນະອັນໃຫຍ່ຫຼວງ ແລະສະງ່າຣາສີ. ສັນຍາວຽງຈັນທນ໌ ເມື່ອວັນທີ 21 ກຸມພາ 1973 ແລະອະນຸສັນຍາ ເມື່ອວັນທີ 14 ກັນຍາ 1973 ໄດ້ບົ່ງໄວ້ວ່າ ອະເມຣິກາ ໄທຍ໌ ແລະປະເທສອື່ນໆ ຕ້ອງເຄົາຣົພນັບຖືບັນດາສິທພື້ນຖານແຫ່ງຊາຕອັນສັກກາຣະບູຊາທີ່ບໍ່ມີຜູ້ໃດຈະລະລ່ວງລະເມີດໄດ້ ຄື ເອກຣາຊ ອະທິປະໄຕຍ໌ ເອກພາພ ແລະບູລະຍະພາພແຫ່ງດິນແດນຂອງພຣະຣາຊອະນາຈັກຣ໌ລາວ, ຕ່າງປະເທສຕ້ອງຢຸດຍິງ ແລະຢຸດເຊົາທຸກການກະທຳທາງດ້ານການແຊກແຊງ ການຮຸກຮານ ແລະການຕິດພັນທຸກຢ່າງທາງດ້ານການທະຫາຣຢູ່ໃນລາວ ບັນດາຝ່າຍລາວທີ່ກ່ຽວຂ້ອງ ຕ້ອງຮັບປະກັນໃຫ້ມີການຢຸດຍິງ ແລະຢຸດເຊົາທຸກການກະທຳທາງດ້ານການທະຫານທີ່ເປັນປໍລະປັກຕໍ່ກັນ, ຮັບປະກັນບັນດາສິທເສຣີພາພປະຊາທິປະໄຕຍ໌ຂອງປະຊາຊົນຢ່າງຄົບຖ້ວນ ເຮັດໃຫ້ນະຄອນຫຼວງວຽງຈັນທນ໌ ແລະນະຄອນຫຼວງພຣະບາງເປັນກາງ. ສ້າງຕັ້ງຄະນະມົນຕຣີປະສົມການເມືອງແຫ່ງຊາຕ ແລະຣັຖບາລປະສົມຊົ່ວຄາວແຫ່ງຊາຕຊຸດໃໝ່, ກຽມພ້ອມທຸກເງື່ອນໄຂສດວກ ເພື່ອດຳເນີນການເລືອກຕັ້ງທົ່ວໄປຕາມຫຼັກການເສຣີພາພ ແລະປະຊາທິປະໄຕຍ໌ຢ່າງແທ້ຈິງ ເພື້ອເລືອກຕັ້ງເອົາສະພາຜູ້ແທນຣາຊດອຣແລະສ້າງຕັ້ງຣັຖບາລປະສົມຊຸດສົມບູຣນ໌, ປະຕິບັຕຄວາມຖືກຕ້ອງປອງດອງແລະເອກພາພຂອງຊາຕ.

ມັນເປັນທັມມະດາຢູ່ແລ້ວວ່າ ເພື່ອໃຫ້ສັນຍາ ແລະອະນຸສັນຍາດັ່ງກ່າວໄດ້ຮັບການປະຕິບັຕຢ່າງເດັດຂາດເຖິງຖອງແລະເພື່ອສ້າງພຣະຣາຊອະນາຈັກຣ໌ໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນນັ້ນ ປະຊາຊົນລາວເຮົາຍັງຈະຕ້ອງຜ່ານຜ່າອຸປສັກແລະຄວາມຫຍຸ້ງຍາກລຳບາກຕ່າງ ໆ ນາ ໆ ຊຶ່ງແມ່ນອິດທິກຳລັງລ່າເມືອງຂຶ້ນຂອງຕ່າງປະເທດ ແລະພວກປະຕິການລູກມືຂອງຈັກກະພັດຢູ່ພາຍໃນປະເທດໄດ້ກໍ່ຂຶ້ນຢູ່ໃນດິນແດນລາວເຮົາ.

ເພາະສະນັ້ນ ໜ້າທີ່ອັນຍິິງໃຫຍ່ ແລະຮີບດ່ວນຂອງປວງປະຊາຊົນລາວເຮົາ ທຸກຊົນຊັ້ນຊົນເຜົ່າ ຂອງສະມາຊິກແຫ່ງອົງການປົກຄອງຂອງຣັຖ, ຂອງບັນດາກຳລັງການເມືອງ, ຂອງບັນດາຜູ້ຊົງຄຸນນະວຸດທິ, ນັກຮຽນຮູ້, ປັນຍາຊົນ ພຣະສົງອົງຄະເຈົ້າ ຂ້າຣາຊການ ທະຫານ ຕຳຣວຈ ທີ່ຮັກຊາຕ ຮັກສັນຕິພາພ ຮັກເອກຣາຊ ຮັກຄວາມເປັນກາງ ແລະຮັກປະຊາທິປະໄຕຍ໌ ນັ້ນແມ່ນ.

ເພີ່ມທະວີຄວາມສາມັກຄີປວງຊົນທັງຊາຕ ເພີ່ມທະວີຄວາມສາມັກຄີ ແລະມິຕພາພ ກັບທຸກປະຊາຊາຕໃນໂລກ ກ່ອນອື່ນແມ່ນກັບບັນດາປະເທດໃກ້ຄຽງ ອອກແຮງສູ້ຊົນ ເຮັດໃຫ້ສັນຍາ ແລະອະນຸສັນຍາວຽງຈັນທຣ໌ ວັນທີ 21 ກຸມພາ ປີ 1973 ໄດ້ຮັບການເຄົາຣົບນັບຖື ແລະປະຕິບັດຢ່າງຄົບຖ້ວນ. ຕໍ່ສູ້ຢ່າງທົນທານໜຽວແໜ້ນ ຕ້ານຣັຖທິລ່າຫົວເມືອງຂຶ້ນແບບໃໝ່ ຂອງອະເມຣິກາແລະພວກຂັດຂວງມ້າງເພສັນຕິພາພ ແລະຄວາມຖືກຕ້ອງປອງດອງຊາຕ ຢູ່ພາຍໃນປະເທດ ເພື່ອປັບປຸງ ແລະປົກປັກຮັກສາສັນຕິພາພ ໃຫ້ໝັ້ນຄົງເຫິງນານ, ສຳເຣັດ ແລະປັບປຸງເອກຣາຊຂອງຊາຕ, ປະຕິບັຕບັນດາສິທເສຣີພາພປະຊາທິປະໄຕຍ໌ຂອງປະຊາຊົນ. ປະຕິບັຕການໄກ່ເກັ່ງກັນ ຈົນກ້າວໄປເຖິງຄວາມຖືກຕ້ອງປອງດອງຊາຕ ແລະເອກພາພຂອງຊາຕ. ພ້ອມກັນນັ້ນ ກໍອອກແຮງກໍ່ສ້າງ ແລະພັທນາເສຖກິຈ ແລະວັນທນະທັມ. ປົວແປງຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເທື່ອລະກ້າວ. ສ້າງພຣະຣາຊອະນາຈັກຣ໌ລາວໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນ ແລະປະກອບສ່ວນເຂົ້າໃນການປົກປັກຮັກສາສັນຕິພາພ ຢູ່ໃນພາກພື້ນອິນດູຈີນ ອາຊີອາຄະເນ ແລະໃນທົ່ວໂລກ.

ສັນຕິພາພ ເອກຣາຊ ເປັນກາງ ປະຊາທິປະໄຕຍ໌ ເອກພາພ ແລະວັທນາຖາວອນ ນີ້ແມ່ນອົງປະກອບອັນຄົບຖ້ວນອັນນຶ່ງອັນດຽວ ທີ່ມີເນື້ອໄນສນິຕຕິດພັນກັນຢ່າງແໜ້ນແຟ້ນ. ສັນຕິພາພອັນໝັ້ນຄົງແທ້ຈິງ ບໍ່ອາດຈະມີຂຶ້ນໄດ້ ຕາບໄດປະເທດຊາຕ ຫາກບໍ່ໄດ້ເອກຣາຊອັນສົມບູນ ແລະຕາບໄດປະຊາຊົນຫາກບໍ່ໄດ້ຊົມໃຊ້ບັນດາສິທເສຣີພາພປະຊາທິປະໄຕຍ໌ຢ່າງຄົບຖ້ວນ. ຍ້ອນແນວນັ້ນ ເອກຣາຊ ແລະປະຊາທິປະໄຕຍ໌ ຈຶ່ງເປັນພື້ນຖານໃຫ້ແກ່ການປົກປັກຮັກສາສັນຕິພາພ ໃຫ້ໝັ້ນຄົງ ເຫິງນານ, ໃຫ້ແກ່ການກໍ່ສ້າງບ້ານເມືອງ ໃຫ້ວັທນາຖາວອນ.

ນະໂຍບາຍພາຍໃນປະເທດ

1. ສາມັກຄີປວງຊົນທັງຊາຕ, ສາມັກຄີບັນດາຊົນຊາຕຊົນເຜົ່າ ບັນດາສາສນາ ແລະທຸກຊັ້ນຄົນ ທຸກຊົນຊັ້ນ, ຕໍ່ສູ້ ໃຫ້ປະຕິບັດສັນຍາ ແລະອະນຸສັນຍາ ຢ່າງຄົບຖ້ວນ ແລະສ້າງພຣະຣາຊອະນາຈັກຣ໌ລາວໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນ.

2. ປະຕິບັດຄວາມສເມີພາພໃນທຸກດ້ານ, ການເມືອງ ເສຖກິຈ ວັທນະທັມ ແລະສັງຄົມ ຣະຫວ່າງບັນດາຊົນຊາຕ ຊົນເຜົ່າ, ໂຕແທນຂອງບັນດາຊົນຊາຕຊົນເຜົ່າ ຕ້ອງມີຖານະເໝາະສົມ ໃນບັນດາອົງການປົກຄອງທຸກຂັ້ນ, ຕ້ອງຊ່ວຍເຫລືອບັນດາຊົນຊາຕສ່ວນໜ້ອຍ. ໃນການປົວແປງຊີວິຕການເປັນຢູ່ ແລະໃຫ້ເຊີດຊູຄວາມຮູ້ຂອງເຂົາເຈົ້າໃຫ້ສູງຂຶ້ນເທື່ອລະກ້າວໃນທຸກດ້ານ.

3. ປະຕິບັຕບັນດາສິທເສຣີພາພປະຊາທິປະໄຕຍ໌ຂອງປະຊາຊົນຢ່າງຄົບຖ້ວນ ເຊັ່ນ: ສິທເສຣີພາພສ່ວນບຸກຄົນ, ສິທເສຣີພາພໃນການເຊື່ອຖື, ສິທເສຣີພາພໃນການປາກເວົ້າ, ສິທເສຣີພາພໃນການຂີດຂຽນ, ສິທເສໜີພາພໃນການໂຮມຊຸມນຸມ, ສິທເສຣີພາພໃນການສ້າງຕັ້ງພັກ ແລະອົງການ ໆ ເມືອງ, ສິທເສຣີພາພໃນການອອກຮັບສມັກເລືອກຕັ້ງ, ສິທເສຣີພາພໃນການໄປມາ ແລະການຕັ້ງພູມລຳເນົາມ ສິທເສຣີພາພໃນການປະກອບວິສາຫະກິຈ ແລະສິທເສຣີພາພໃນການເປັນເຈົ້າຂອງຊັບສິນສ່ວນຕົວ. ຕ້ອງລົບລ້າງທຸກກົດໝາຍ ທຸກຂໍ້ກຳນົດ ແລະທຸກການຈັດຕັ້ງ ທັງຫ້າມຂາດທຸກການກະທຳທີ່ຝືນຕໍ່ບັນດາສິທເສຣີພາພປະຊາທິປະໄຕຍ໌ຂອງປະຊາຊົນ.

4. ເລືອກຕັ້ງແບບປະຊາທິປະໄຕຍ໌ ເພື່ອປັບປຸງບັນດາອົງການປົກຄອງຂອງຣັຖ ໃນຂັ້ນບ້ານ ແລະຂັ້ນຕາແສງ ໃຫ້ເຂັ້ມແຂງແລະຄົບຖ້ວນ. ສ່ວນຂັ້ນເມືອງແລະຂັ້ນແຂວງນັ້ນ ໃນເມື່ອລໍຖ້າກົດໝາຍເລືອກຕັ້ງທົ່ວໄປສບັບໃໝ່ ທີ່ຄນະມົນຕຣີ ຈະສເນີໃນຂ້າງໜ້ານີ້ນັ້ນ. ໃຫ້ປະຕິບັດຕາມທີ່ເຄີຍເຮັດມາ. ສ່ວນຄນະມົນຕຣີນັ້ນ ໃຫ້ມີຢູ່ໃນທຸກຂັ້ນ, ແຕ່ຂັ້ນບ້ານຂຶ້ນຮອດຂັ້ນແຂວງ, ດ້ວຍການເລືອກຕັ້ງແບບປະຊາທິປະໄຕຍ໌, ກວດກາ ດັດແປງ ແລະແກ້ໄຂເພື້ມເຕືມກົດໝາຍເລືອກຕັ້ງ ແລະຈັດຕັ້ງການເລືອກຕັ້ງທົ່ວໄປຢ່າງມີເສຣີພາພ ແລະປະຊາທິປະໄຕຍ໌ອັນແທ້ຈິງ ເພື່ອເລືອກຕັ້ງເອົາສພາຜູ້ແທນຣາສດອນ ແລະສ້າງຕັ້ງຣັຖບາລປະສົມແຫ່ງຊາຕຊຸດສົມບູນແບບ. ປັບປຸງອຳນາຈຕຸລາການໃຫ້ມີຄວາມຍຸຕິທັມຢ່າງແທ້ຈິງ, ຄົ້ນຄົ້ວາດັດແປງແລະແກ້ໄຂເພີ້ມເຕີມຣັຖທັມມະນູນ ບົນພື້ນຖານແຫ່ງການເຄົາຣົບນັບຖືພຣະຣາຊບັນລັງ ແລະການຮັບປະກັນສິທເສຣີພາພ ປະຊາທິປະໄຕຍ໌ຂອງປະຊາຊົນຢ່າງເຖິງຖອງ ເພື່ອສ້າງພຣະຣາຊອານາຈັກຣ໌ລາວໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນ.

5. ເຄົາຣົບນັບຖືພຣະພຸທສາສນາ ແລະສາສນາອື່ນໆ, ປົກປັກຮັກສາວັດວາອາຮາມ ແລະໂບດ ສິມ, ກະດີວິຫານ ແລະປູຊະນິຍະວັດຖຸອື່ນ ໆ, ປົກປັກຮັກສາສິທສູດມົນ ເທສນາ ຂອງພຣະສົງ ແລະຂອງນັກບວດສາສນາອື່ນ ໆ, ປົກປັກຮັກສາສນິກຊົນ ຂອງທຸກໆສາສນາ.

6. ປະຕິບັດສິທສເມີພາພ ຣະຫວ່າງເພດຍິງກັບເພດຊາຍໃນທຸກດ້ານການເມືອງ ເສຖກິຈ ວັທນະທັມ ແລະສັງຄົມ. ຊ່ວຍເຫລືອແມ່ຍິງ ໃຫ້ມີຣະດັບຄວາມຮູ້ສູງຂຶ້ນເທື່ອລະກ້າວໃນທຸກດ້ານ ແລະເສີມຂຍາຍຄວາມສາມາດຂອງແມ່ຍິງເຂົ້າໃນທຸກວຽກງານ. ກໍ່ສ້າງແລະປົກປັກຮັກສາປະເທດຊາຕ, ປົວແປງຊີວິດການເປັນຢູ່ຂອງແມ່ຍິງຜູ້ອອກແຮງງານໃນບັນດາຊົນຊາຕຊົນເຜົ່າ, ພິເສດແມ່ນເອົາໃຈໃສ່ປົກປັກຮັກສາຜູ້ເປັນແມ່ ແລະເດັກນ້ອຍ.

7. ກໍ່ສ້າງພື້ນຖານເສຖກິຈແລະການເງິນແຫ່ງຊາຕທີ່ເປັນເຈົ້າຕົນເອງແລະມັ່ງຄັ່ງສົມບູນໄປເທື່ອລະກ້າວ ດ້ວຍວິທີອີງໄຊ່ພຍາກອນທັມຊາດພາຍໃນປະເທດ ແລະກຳລັງເຫື່ອແຮງຂອງປະຊາຊົນເຮົາເປັນຕົ້ນຕໍ, ພ້ອມກັນນັ້ນກໍ່ຕັ້ງສແວງຫາການຊ່ວຍເຫຼືອຈາກຕ່າງປະເທດອັນບໍ່ມີເງື່ອນໄຂການເມືອງຜູກມັດ ເພື່ອເຮັດໃຫ້ປະຊາຊົນໄດ້ມີຄວາມຢູ່ເຢັນເປັນສຸກ ແລະບ້ານເມືອງໄດ້ມີຄວາມເຂັ້ມແຂງຂຶ້ນເທື່ອລະກ້າວ. ຂຍາຍວຽກງານກະສິກັມການປ່າໄມ້ ອຸດສະຫະກັມ ແລະຫັຖກັມ ການຄ້າຂາຍ ການຄົມມະນາຄົມ ແລະການຂົນສົ່ງໂດຍຖືເອົາການກະສິກັມ ແລະການປ່າໄມ້ເປັນພື້ນຖານໃຫ້ແກ່ການກໍ່ສ້າງ ແລະຂຍາຍອຸດສາຫະກັມແຫ່ງຊາຕ ໃຫ້ກ້າວຂຶ້ນເຖິງການຂຍາຍໂຕຮອບດ້ານ. ພັທນາເສຖກິຈແຫ່ງຊາຕທີ່ເປັນເຈົ້າຕົນເອງ ແລະຮັ່ງມີເຂັ້ມແຂງ, ສົ່ງເສີມການຜະລິດຂອງປະຊາຊົນຢ່າງແຂງແຮງ ພ້ອມກັນນັ້ນກໍເພີ້ມທະວີຂົງເຂດເສຖກິຈ ຊຶ່ງແມ່ນຣັຖເປັນຜູ້ຄຸ້ມຄອງ. ສົ່ງເສີມໃຫ້ເອກຊົນປະກອບວິສາຫະກິຈຢ່າງອິສຣະ ຫຼືຮ່ວມລົງທຶນນຳຣັຖ ຕາມຫຼັກການທີ່ເປັນປະໂຍດໃຫ້ບ້ານເມືອງ. ທັງຮັບປະກັນສິດປະໂຍດຂອງຣັຖ ແລະຂອງເອກຊົນ, ປະຕິບັດລະບອບພາສີອາກອນທີ່ຍຸຕິທັມ ໃຫ້ສົມເຫດສົມຜົນ ແລະລະບອບຄຸ້ມຄອງການເງິນອັນຖືກຕ້ອງ ຢ່າງເຄັ່ງຄັດ.

8. ປົກປັກຮັກສາຮີດຄອງປະເພນີອັນດີງາມ ຂອງບັນດາຊົນຊາດຊົນເຜົ່າ, ຂຍາຍວັທນະທັມແລະການສືກສາແຫ່ງຊາຕ ແລະກ້າວໜ້າ. ເຊີດຊູຈິດໃຈແຫ່ງຊາຕ ສະຕິສາມັກຄີ ມິດຕພາພ ຣະວ່າງຊົນຊາຕຊົນເຜົ່າ ແລະຣະດັບວັທນະທັມ ວິທຍາສາດ ແລະວິທຍາການ ຂອງປະຊາຊົນ ຊົນຊາຕຊົນເຜົ່າ ໃຫ້ສູງຂຶ້ນເທື່ອລະກ້າວ. ປະຕິບັຕການສິດສອນ ແລະການຮຽນເປັນພາສາລາວ ແລະດ້ວຍອັກສອນລາວ ໃນທຸກໂຮງຮຽນ ທຸກຊັ້ນ ທຸກປະເພດ, ຂຍາຍການສຶກສາປະເພດຕ່າງ ໆ ຢ່າງສົມບູນ ເຊັ່ນ: ຣະວ່າງຂັ້ນສຶກສາສາມັນ, ຂັ້ນມັທຍົມອາຊີວະສຶກສາ ແລະຂັ້ນມະຫາວິທຍາລັຍ. ກໍ່ສ້າງແລະບຳຣຸງຖັນແຖວພະນັກງານ ຂ້າຣາຊການ ແລະພະລາກອນຜູ້ຊຳນິຊຳນານ ເພື່ອຮັບໃຊ້ພາຣະກິຈກໍ່ສ້າງແລະປົກປ້ອງຮັກສາປະເທດຊາຕ.

9. ຂຍາຍຕານ່າງສາທາຣະນະສຸຂໃຫ້ລົງຮອດຕາແສງແລະໝູ່ບ້ານທີ່ຢູ່ຫ່າງໄກ ສອກຫຼີກ ເພື່ອປ້ອງກັນຮັກສາ ສຸຂພາບຂອງປະຊາຊົນບັນດາຊົນຊາຕຊົນເຜົ່າ, ກຳຈັດປັດເປົ່າພຍາດຕິດແປດຕ່າງ ໆ, ກ່ອນອື່ນແມ່ນພຍາດໄຂ້ປ່າ ຂີ້ທູດ ໂຣກພະຍາດລຳໄສ້ ແລະອື່ນ ໆ, ຕ້ານການຕາຍໜຸ່ມນ້ອຍ ແລະການຕາຍກຸ່ມຕາຍພາຍ ເພື່ອເພີ້ມຈຳນວນພົລເມືອງ ໃຫ້ແກ່ບັນດາຊົນຊາຕຊົນເຜົ່າ.

10. ຮັບປະກັນໃຫ້ມີວຽກເຮັດງານທຳແລະປົວແປງຊິວິດການເປັນຢູ່ດ້ານວັດຖຸ ແລະຈິດໃຈໃຫ້ແກ່ພົລເມືອງທຸກຄົນຢູ່ໃນຕົວເມືອງແລະຊົນນະບົດ. ລົບລ້າງການຍຶດເອົາດິນດອນ ໄຮ່ນາ ຮົ້ວສວນ, ການໃຊ້ແຮງງານ ແລະການປະກອບວັດຖຸອັນໜັກໜາ ຂອງຊາວໄຮ່ຊາວນາ ແລະຊາວກັມກອນ, ຊ່ວຍເຫຼືອຜູ້ປະສົບໄຟສົງຄາມ ຜູ້ເຖົ້າແກ່ຊະຣາ ແລະເດັກກ່ຳພ້າກ່ຳພອຍທີ່ບໍ່ມີບ່ອນເພິ່ງພາອາໄສ ແລະຜູ້ພິການເສັຽອົງຄະ ແລະຄອບຄົວຂອງນາຍແລະພົນທະຫານ ແລະຂອງນາຍແລະພົນຕຳລວຈ ເພື່ອໃຫ້ເຂົາເຈົ້າໄດ້ທຳມາຫາລ້ຽງຊີບ ແລະສາມາດປະກອບສ່ວນເຂົ້າໄນການກໍ່ສ້າງປະເທດຊາຕບ້ານເມືອງ. ປົກປັກຮັກສາສິທປະໂຍດຂອງພີ່ນ້ອງຮ່ວມຊາຕ ທີ່ຢູ່ຕ່າງປະເທດ ແລະສິທປະໂຍດອັນຊອບທັມຂອງຊາວຕ່າງດ້າວທີ່ມາຫາລ້ຽງຊີບໂດຍດີ ແລະເຄົາຣົບນັບຖືກົດໝາຍຂອງບ້ານເມືອງເຮົາ.

11. ລົບລ້າງຮ່ອງຮອຍ ຂອງວັທນະທັມອັນເສື່ອມຊາມຂອງຕ່າງປະເທດ ແລະບັນດາໄຟອັນຕຣາຍທາງດ້ານສັງຄົມ, ເປັນຕົ້ນແມ່ນການລັກປຸ້ນ ຂ້າເຈົ້າເອົາຂອງ ການໂສເພນີ ແລະການພະນັນ, ແນໄສ່ຮັບປະກັນຄວາມເປັນລະບຽບຮຽບຮ້ອຍ ແລະຄວາມສງົບຂອງສັງຄົມ. ປົກປັກຮັກສາຮີດຄອງປະເພນີອັນດີງາມຂອງຊາຕ. ປົກປັກຮັກສາຄຸນສົມບັຕ ແລະກຽຕສັກສີຂອງຄົນລາວ ແລະຮຸ່ນໜຸ່ມ ຍຸວະຊົນຍິງຊາຍ ອັນສົດຊື່ນ ປອດໃສຂອງຊາຕ.

12. ກໍ່ສ້າງກອງທັບແລະກຳລັງປ້ອງກັນຄວາມສງົບ ອັນເປັນເອກພາບຂອງຊາຕ ໃຫ້ມີນ້ຳໃຈຮັກຊາຕ ຮັກປະຊາຊົນ ກຽມພ້ອມທີ່ຈະປົກປັກຮັກສາປະເທດຊາຕ ປົກປັກຮັກສາສັນຕິພາພ ຄວາມສງົບສຸຂ ຊີວິດແລະຊັບສິນຂອງປະຊາຊົນ. ທະຫານຕ້ອງເຮັດການຜຼິດ ຫາກຸ້ມຕົນເອງສ່ວນໃດສ່ວນນຶ່ງທາງດ້ານສະບຽງອາຫານ ເພື່ອລົດຜ່ອນການຫາບແບກຂອງປະຊາຊົນ. ກອງທະຫານຕ້ອງເຂົ້າຮ່ວມໃນການກໍ່ສ້າງເສຖກິຈ ແລະວັທນະທັມ ແລະປົວແປງຊີວິດການເປັນຢູ່ຂອງປະຊາຊົນ. ພາຍໃນກອງທັບແລະກຳລັງປ້ອງກັນຄວາມສງົບຂອງຊາຕ ຕ້ອງມີປະຊາທິປະໄຕຍ໌ ແລະເຊີດຊູຣະບຽບວິນັຍ, ເອົາໃຈໃສ່ເບິ່ງແຍງຊີວິດການເປັນຢູ່ຂອງນາຍແລະພົນທະຫານ ແລະຂອງນາຍແລະພົນຕຳຣວຈ.

13. 1: ບັນດານະໂຍບາຍການຕ່າງປະເທດ, ທວງໃຫ້ບັນດາປະເທດທີ່ກ່າວໃນພາກໜ້າທີ່ຮ່ວມຂ້າງເທິງນີ້ຕ້ອງເຄົາຣົບນັບຖືບັນດາສິທພື້ນຖານແຫ່ງຊາຕ ຄື ອະທິປະໄຕຍ໌ ເອກຣາຊ ເອກພາພ ແລະບູຣະນະພາພແຫ່ງດິນແດນຂອງລາວ, ຕ້ອງປະຕິບັດສັນຍາແລະອະນຸສັນຍາວຽງຈັນທ໌ ປີ ຄ.ສ 1973 ຢ່າງເຂັ້ມງວດ ແລະເຖິງຖອງ. ທວງໃຫ້ສຫະຣັຖອະເມຣິກາ ຕ້ອງປະກອບສ່ວນເຂົ້າໃນການຮຳບາດແຜສົງຄາມຢູ່ໃນລາວຢ່າງເໝາະສົມ.

14. 2: ເພີ່ມທະວີສັມພັນທະໄມຕຣີກັບບັນດາປະຊາຊາຕ, ວາງສາຍພົວພັນທາງການທູຕກັບທຸກປະເທດ ທີ່ເຄົາຣົບນັນຖືເອກຣາຊ ແລະອະທິປະໄຕຍ໌ຂອງລາວ, ປະຕິບັດຫຼັກການ 5 ປະການແຫ່ງການຢູ່ຮ່ວມກັນໂດຍສັນຕິ ຂຍາຍສາຍພົວພັນອັນເປັນປົກກະຕິກັບທຸກປະເທດ ໂດຍບໍ່ຈຳແນກຣະບອບການເມືອງ ແລະສັງຄົມ ກ່ອນອື່ນແມ່ນກັບປະເທດເພື່ອນບ້ານໃກ້ຄຽງ, ບໍ່ອະນຸຍາດໃຫ້ປະເທດໃດແຊກແຊງເຂົ້າໃນກິຈການພາຍໃນຂອງລາວ ບໍ່ວ່າຢູ່ພາຍໃຕ້ຮູບການໃດ ໆ. ລາວບໍ່ເຂົ້າຮ່ວມກຸ່ມສັມພັມທາງທະຫານ ຫຼື ກຸ່ມທະຫານໃດ ໆ ຫຼື ທີ່ມີລັກສນະໃດ ໆ ກໍຕາມ ທີ່ບໍ່ສອດຄ່ອງກັບແນວທາງສັນຕິພາພ ເອກຣາຊ ແລະຄວາມເປັນກາງຂອງພຣະຣາຊອານະຈັກລາວ. ລາວບໍ່ຮັບຮູ້ການອາຣັກຂາຂອງກຸ່ມສັມພັນທາງທະຫານ ຫຼື ກຸ່ມທະຫານໃດ ໆ.

15. 3: ຮັບເອົາການຊ່ວຍເຫຼືອໂດຍກົງ ແລະບໍ່ມີເງື່ອນໄຂການເມືອງຜູກມັດ ຂອງບັນດາປະເທດທີ່ມີເຈຕນາດີ ຢາກຊ່ວຍເຫຼືອລາວ ໃນການຟື້ນຟູ ແລະກໍ່ສ້າງເສຖກິຈ ແລະຂຍາຍວັທນະທັມ ບົນພື້ນຖານແຫ່ງການເຄົາຣົບນັບຖືເອກຣາຊ ແລະອະທິປະໄຕຍ໌ ຂອງລາວ. ຂຍາຍການຄ້າ ແລະການຮ່ວມມືທາງດ້ານເສຖກິຈ ກັບທຸກປະເທດ ຕາມຫຼັກການສະເມີພາພ ຕ່າງຜ່າຍຕ່າງມີຜົນປະໂຍດ ແລະຮັບປະກັນອະທິປະໄຕຍ໌ ແລະເອກຣາຊຂອງລາວ.

16. 4: ເຄົາຣົບນັນຖືສັນຍາຕ່າງ ໆ ທີ່ລາວໄດ້ເຊັນກັບຕ່າງປະເທດ ຊຶ່ງຍັງສອດຄ່ອງກັບຜົນປະໂຍດຂອງປະຊາຊົນລາວ, ລົບລ້າງສັນຍາໄດທີ່ຂັດແລະຜືນຕໍ່ຫຼັກການຕ່າງ ໆ ດັ່ງກ່າວ.

17. 5: ສແວງຫາການເປັນໃຈສນັບສນູນ ຂອງຣັຖບາລ ແລະປະຊາຊົນບັນດາປະເທດ ແລະຂອງບັນດາອົງການຈັດຕັ້ງສາກົລ ທີ່ມີຕໍ່ພາຣະກິຈອັນເປັນທັມແຫ່ງການຕໍ່ສູ້ ເພື່ອປັບປຸງສັນຕິພາພ ໃຫ້ໝັ້ນຄົງເຫິງນານ ແລະເພື່ອສຳເຣັດແລະປັບປຸງເອກຣາຊ ແລະຄວາມເປັນກາງຂອງພຣະຣາຊອານາຈັກລາວ.

18. 6: ສນັບສນູນຂບວນການຕໍ່ສູ້ຂອງປະຊາຊົນປະເທດຕ່າງ ໆ ໃນພາກພື້ນອິນດູຈີນ ອາຊີອາຄະເນ ແລະໃນທົ່ວໂລກ ເພື່ອສັນຕິພາພ ເອກຣາຊ ແຫ່ງຊາຕ ປະຊາທິປະໄຕຍ໌ ແລະຄວາມກ້າວໜ້າ. ໃນເວລານີ້ປະເທດເຮົາຍັງຢູ່ໃນສະພາບທີ່ແບ່ງອອກເປັນ 2 ເຂດ ໂດຍແມ່ນ 2 ຝ່າຍຕ່າງກວດກາຄວບຄຸມ, ແຕ່ວ່າ ຄວາມມຸ້ງມາດປາຖນາທົ່ວໄປຂອງພີ່ນ້ອງລາວຮ່ວມຊາຕ ໃນທົ່ວປະເທດ ແມ່ນຢາກເຫັນບ້ານເມືອງມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນ ຍ້ອນແນວນັ້ນທັງສອງຝ່າຍ ຕ້ອງປະຕິບັດແນວທາງ ແລະນະໂຍບາຍຕ່າງ ໆ ທີ່ວາງອອກມາຢູ່ຂ້າງເທິງນັ້ນ ຢ່າງເຄັ່ງຄັດຄົບຖ້ວນ ແລະເຖິງຖອງ ຢູ່ໃນທຸກທ້ອງຖິ່ນທີ່ຂຶ້ນກັບເຂດກວດກາຂອງໃຜລາວໂດຍມີການແນະນຳເປັນເອກພາພກັນຂອງສະຖາບັນສູງສຸດຂອງຣັຖ ຊຶ່ງສອງຝ່າຍໄດ້ເປັນເອກສັນກັນສ້າງຕັ້ງຂຶ້ນ ຄື: ຄນະມົນຕຣີປະສົມການເມືອງແຫ່ງຊາຕ ແລະຣັຖບາລປະສົມຊົ່ວຄາວແຫ່ງຊາຕ. ພ້ອມກັນນັ້ນທັງສອງຝ່າຍຍັງຕ້ອງສືບຕໍ່ເຈຣະຈາ ປຶກສາຫາລືກັນ ເພື່ອຊອກຫາວິທີການແກ້ໄຂ ບັນດາບັນຫາທີ່ພົວພັນຣະວ່າງທັງສອງຝ່າຍ ແລະຣະວ່າງສອງເຂດຢ່າງຖືກຕ້ອງ

ເໝາະສົມ ບົນຈິດໃຈສເມີພາພ ເຄົາຣົບນັບຖື ແລະເຂົ້າໃຈຊຶ່ງກັນແລະກັນ ຜ່ອນຜັນສັ້ນຍາວໃຫ້ແກ່ກັນ ບໍ່ໃຫ້ຝ່າຍໃດໜີບເຕັງແລະກືນກິນຝ່າຍໃດ ເພື່ອສ້າງເງື່ອນໄຂສະດວກ ໃຫ້ແກ່ການໄກ່ເກັ່ຽກັນ ຈົນໄປເຖິງຄວາມຖືກຕ້ອງປອງດອງ ແລະເອກພາພຂອງຊາຕ.

ຄນະມົນຕຣີປະສົມການເມືອງແຫ່ງຊາຕ ແລະຣັຖບາລປະສົມຊົ່ວຄາວແຫ່ງຊາຕ ຂໍຮຽກຮ້ອງຢ່າງສຸດອົກສຸດໃຈ ມາຍັງປວງປະຊາຊົນລາວທຸກຊົນຊາຕຊົນເຜົ່າໃນທົ່ວປະເທດ ທຸກທ່ານຢູ່ໃນບັນດາອົງການປົກຄອງຂອງຣັຖ ທຸກກຳລັງການເມືອງ ຜູ້ຊົງຄຸນນະວຸດທິ ນັກຮຽນຮູ້ ປັນຍາຊົນ ພຣະສົງອົງຄະເຈົ້າ ຂ້າຣາຊການ ທະຫານ ແລະຕຳຣວຈ ທີ່ຮັກຊາຕ ຮັກສັນຕິພາພ ເອກຣາຊ ຄວາມເປັນກາງ ແລະປະຊາທິປະໄຕຍ໌ທຸກທ່ານຈົ່ງອອກແຮງສູ້ຊົນ ເພື່ອປະຕິບັດໂຄງການ ໆ ເມືອງນີ້ຢ່າງຄົບຖ້ວນ ເພື່ອກໍ່ສ້າງພຣະຣາຊອານາຈັກລາວ ໃຫ້ມີສັນຕິພາພ ເອກຣາຊ ຄວາມເປັນກາງ ປະຊາທິປະໄຕຍ໌ ເອກພາພ ແລະຄວາມວັທນາຖາວອນ.

ຄນະມົນຕຣິປະສົມການເມືອງແຫ່ງຊາຕ ຂໍຮຽກຮ້ອງດ້ວຍຄວາມນັບຖືຢ່າງສູງ ມາຍັງຣັຖບາລທຸກປະເທດ ແລະປະຊາຊົນຜູ້ຮັກຫອມສັນຕິພາພ ແລະຄວາມເປັນທັມໃນທົ່ວໂລກ ຈົ່ງສືບຕໍ່ສນັບສນູນການຕໍ່ສູ້ອັນເປັນທັມຂອງປະຊາຊົນລາວ ທີ່ແນໃສ່ການປັບປຸງສັນຕິພາພ ເອກຣາຊແຫ່ງຊາຕ ແລະກໍ່ສ້າງບ້ານເມືອງລາວໃຫ້ຈະເລີນກ້າວໜ້າ.